Muny maǵan dekannyń qabyldaý bólmesindegi hatshy apaı aıtyp jáne ondaı jaýapty jerge keshikpeı barýym kerek ekendigin qatań eskertti. Sóıtip erteńine aıtylǵan ýaqytta álgi bólimniń esigin qaǵyp, ishke kirip, jazý ústelderi bir-birine qarama-qarsy qoıylǵan eki kisige sálem berdim.
– Iá-á, kel, bala, – dedi shashyn artyna qaıyrǵan qaratory óńdi, jyly júzdi qalamger aqyryn ǵana basyn shulǵyp.
– Shaqyrtqan ekensizder...
– Á-á, KazGÝ-den keldiń be? Aty-jóniń kim?
Aıttym.
– Bilem, bilem! Biz seniń «Dolana» degen áńgimeńdi jas jazýshylardyń «Arman qanatynda» atty jınaǵyna engizeıin dep otyr edik, endi sonyń annotasııasyna qysqasha ómirbaıandyq derekteriń kerek bolyp tur. Men osy jınaqtyń redaktory – jazýshy Nurqasym Qazybekov degen aǵań bolamyn. Al myna kisi qazaqtyń kórnekti aqyny – О́tejan Nurǵalıev. Biletin shyǵarsyń?
– Bilem.
– Endeshe men jazyp alaıyn, sen aıta ber.
Sóıtti de Nurqasym aǵa meniń qaı jyly, qaı aıda, qaı kúni, qaı jaqta týǵanymdy jazyp jatyp, KazGÝ-diń jýrnalıstıka fakýltetiniń stýdenti degen tusqa kelgende az-kem kidirip qaldy.
Sonsoń ózine qarama-qarsy ústelde otyrǵan aqynǵa suraýly pishinde kóz salyp:
– О́teke, qalaı oılaısyz, KazGÝ-diń stýdenti dep jazǵanymyz durys pa, joq álde, KazGÝ-de oqıdy degenimiz jón be? – dedi.
Kóz aldyndaǵy qalyń qoljazbadan aqyryn ǵana basyn kóterip, astyńǵy ernin jymqyryp, aıasy úlken dóńgelek janaryn keń ashyp, maǵan bir ýaq qadala qarap qalǵan aqyn О́tejan Nurǵalıev:
– Ol endi, bul balanyń ózine baılanysty ǵoı, – dep taǵy biraz kidirdi. – Eger shyn máninde sabaqqa baryp, leksııa tyńdap, úıge berilgen tapsyrmalardy oryndap júrse, «oqıdy» dep jazǵanymyz durys. Al eger, qashyp-pysyp, qydyryp, bir sabaǵyna kelip, ekinshisinen ketip qalyp júrgen qý bolsa, onda «stýdenti» deı salǵan jón bolady menińshe!
Osy sátte О́tekeńdi muqııat tyńdap otyrǵan Nurekeń – belgili jazýshy Nurqasym Qazybekov qarqyldap kúlip jiberdi. Men de shydaı almaı, jymyń ete qaldym.
Keıin kitap basylyp shyqqanda bir-aq kórdim ǵoı, qaıran aǵalarym «oqıdy» dep jazypty.
Nurǵalı ORAZ,
«Egemen Qazaqstan»
